Article Summary
Kupang, hosi loron 15-16 Maiu 2025, delegasaun téknika altu nivel husi AIFAESA, ne’ebé lidera husi Sua Exelénsia Dra. Odete da Silva Viegas, Inspetora Jerál, hala’o vizita institusionál ba Balai Besar BPOM (Badan Pengawas Obat dan Makanan) iha Kupang – Nusa Tenggara Timur, Indonézia.
Objetivu prinsipál maka atu hametin kooperasaun téknika entre instituisaun maun-alin rua no prepara pasu sira ba renovasaun Memorandu Entendimentu (MoU) entre AIFAESA no BPOM Indonézia, ne'ebé nia validade atuál remata iha Juñu 2025. MoU ida-ne'e sai esensiál hodi permite AIFAESA iha kolaborasaun nebe'e diak liu relasiona ho teste amostra nebe'e haruka ba BPOM Kupang-NTT atu bele habadak tempu relasiona ho fo sai rezultadu.
Durante vizita, ekipa AIFAESA iha oportunidade atu koñese laboratóriu mikrobiolojia no kímika iha BPOM Kupang — referénsia ida ba exelénsia rejionál. Observasaun direta ida-ne’e iha valór boot tebes, tanba sei sai nu’udar modelu tékniku no operasionál ba futuru Laboratóriu Nasionál Seguransa Ai-han Timor-Leste nian, ne’ebé nia reabilitasaun la’o hela no hein atu remata iha tinan ida-ne’e.
Implementasaun formasaun prátika ba tempu badak (OJT) ba tékniku timoroan sira iha BPOM Kupang mós diskute, nune’e mós formasaun espesífiku iha área metrolojia no kalibrasaun, ne’ebé esensiál atu garantia padraun internasionál iha futuru laboratóriu AIFAESA nian.
Pontu importante seluk ne’ebé aborda mak preokupasaun kona-ba produtu balun ne’ebé to’o iha Timor-Leste ho selo “SNI” (sertifikasaun nasionál Indonézia), maibé ne’ebé sempre la prienxe kritériu kualidade. BPOM kompromete atu servisu hamutuk hodi garante trazabilidade no fahe informasaun ne’ebé boot liu entre nasaun rua ne’e.
Vizita ne’e reforsa amizade institusionál no kompromisu mútuo hodi proteje saúde públika no seguransa ai-han ba ita-nia populasaun sira.
Média - Delegasaun Kupang
SIP/AIFAESA.
Start typing your article content here...