Dili, 19/12/2025 – Autoridade Inspesaun no Fiskalizasaun ba Atividade Ekonómika, Sanitária, no Alimentár, I.P. (AIFAESA, I.P.), partisipa másimu iha Jantar Confraternização do Retiro Institucional ho tema: “Papel do Servidores Públicos no Desenvolvimento do País”, ne’ebé hala’o iha Sentru Konvensaun Dili (CCD).
Eventu solene ne’ebé organiza husi Gabinete Vise Primeiru-Minístru, Minístru Koordenadór Assuntu Ekonómiku (MCAE) no Ministériu Turizmu no Ambiente (MTA), hetan honra boot ho prezensa husi Sua Exelénsia Primeiru-Minístru, Kay Rala Xanana Gusmão.
Reprezenta AIFAESA I.P., marka prezensa mós Inspetóra Jerál, Sub-Inspetóra, Fiskál Úniku, akompaña husi Diretores, Assesór, no funsionáriu hotu. Iha biban ida-ne’e, partisipa mós membru Governu sira seluk hanesan Minístru Komérsiu no Indústria, Minístru Interior, Minístru Juventude no Desportu, Minístru Transportes no Komunikasaun, Sekretáriu Estadu Florestas, Sekretáriu Estadu Komunikasaun Sosiál, Governadór Banku Sentrál, hamutuk ho instituisaun públika hotu ne’ebé tutela iha MCAE no MTA nia okos.
Iha ksolok selebrasaun Natal no Tinan Foun nian, Reverendu Padre Angelo Salsinha fó reflesaun espirituál ida ne’ebé kle’an ba konvidadu hotu, hodi hanoin hikas fali valór servisu nian ba povu no nasaun.
Momentu ne’ebé espesiál liu ba AIFAESA I.P. mak wainhira instituisaun ne'e simu sertifikadu rekoñesimentu nu’udar “Instituto Público Exemplar do Ano 2025”. Rekoñesimentu ne’e sai hanesan evidénsia ba dedikasaun, integridade, no servisu maka’as ne’ebé kórpu dirijente no funsionáriu hotu hatudu ona durante ne’e hodi servi ba Estadu no Povu.
Prezensa tomak husi família boot AIFAESA nian iha eventu ne’e hatudu unidade no hametin liután espíritu servisu ekipa nian hodi enfrenta dezafiu foun iha tinan 2026 ne’ebé sei mai.
Mídia - Arc. & Ekipa SIP
SIP/AIFAESA.