Díli, 19/12/2025 - AIFAESA hahú husi órgaun, diretores, assessores to’o funsionárius partisipa iha Retiru Institusionál ho tema “Papél husi Servidores Públikus iha Dezenvolvimentu Ekonómiku no Sosial País nian” ne’ebé organiza husi Ministériu Koordenadór Asuntu Ekonómiku (MCAE) no Ministériu Turizmu Ambiente (MTA) iha Sentru Konvensaun Díli (CCD), sexta-feira ne’e.
Liafuan murak hato’o husi S.E., Primeiro Ministru Kay Rala Xanana Gusmão hanesan reflesaun ida ba instituisaun tuteladu sira hotu ne’ebé hamahan aan iha MCAE no MTA nia okos, atu sai servidores nasaun nian tenki servisu ho fuan no responsabilidade, uza kapasidade atu kria buat foun, nune’e bele kontribui ba setór ekonomia iha Timor-Leste.
Vise Primeiru Ministru, Ministru Koordenadór Asuntu Ekonómiku no Ministru Turizmu Ambiente S.E., Sr. Francisco Kalbuadi Lay agradese ba partisipasaun husi entidade tuteladu sira hotu hanesan Institutu Públiku no Empreza Públika sira, liu husi reflesaun ne’e bele hafanu ita hotu oinsá kada entidade ida-idak bele hanoin ona atu kontribui liu husi prestasaun servisu, foka ba dezenvolve área servisu ida idak nian. Sai servidór nasaun nian ne’ebé bele presta servisu ho kualidade, responsabilidade no firme, hodi lori moris di’ak ba povu.
Iha okaziun ne’e, Prezidente Komisaun Funsaun Públika Sr. Agustinho Letêncio de Deus hato’o mós perspetiva liga ho tema reflesaun nian, nune’e dada atensaun tebes husi funsionáriu sira hotu hanesan servidores públikus iha nasaun ne’e.
Entretantu, marka prezensa iha atividade importante ne’e mai husi bainaka espesiál ne’ebé sempre apoiu governu hanesan, Embaixada Xineza iha TL. Aleinde ne’e entidade relevantes sira ANLA, TRADE INVEST, BAMBO, INDIMO, CLN, IQTL, SERVE, no seluk tan inklui AIFAESA rasik.
Mídia - Ekipa SIP
SIP/AIFAESA.