Díli, 04/12/2025 – AIFAESA, I.P. hamutuk ho TradeInvest Timor-Leste realiza semináriu nasionál loron daruak hodi diskute oinsá hametin sistema regulatóriu, protesaun konsumidór, no dada investimentu hodi prepara nasaun ba adesaun ASEAN no WTO, ne'ebé mak realiza iha JL World, Area Branca, Dili.
Eventu ne’e hetan partisipasaun hosi Vise-Primeiru-Ministru no Ministru Koordenador Asuntu Sosiál S.E. Eng. Mariano Asanami Sabino ofisialmemte loke semináriu ba loron daruak nian.
Inspetóra-Jerál AIFAESA, Dra. Odete da Silva Viegas, hato’o agradese ba prezensa hosi entidade Governu no parseiru emprezariál sira. Inspetóra subliña katak setór emprezariál la’ós de’it objetu regulamentu nian, maibé hanesan parseiru estratéjiku ida hodi garante produtu Timor-Leste seguru no kompetitivu iha merkadu globál.
Ajenda ba loron daruak, iha Sesaun I diskute Perspetiva CFP ba Administrasaun Direta no Indireta Estadu iha Timor-Leste: Dezafiu no Solusaun ideal no papel hosi Trade Invest TL hodi atrai investimentu no dezenvolvimentu ekonómiku.
Iha sesaun II kontinua ho aprezentasaun hosi IQTL kona-ba Papel IQTL (sertifikasaun no normalizasaun) iha fasilitasaun importasaun no exportasaun iha merkadu rejional no global, kapasidade infraestrutura regulatória ba kontrolu ai-han iha pontu entrada hosi Autoridade Aduaneira-Alfandega, no expetativa hosi CCITL hodi hasa'e kapasidade exportasaun no kompetividade iha merkadu rejionál no globál no Kontrolu atividade ekonómika iha TL hosi parte AIFAESA mak aprezenta.
Seminariu refere partisipa
mos hosi membru Governu, Setór Privadu sira, Universitariu, operador ekónomiku no entidade relevante sira seluk.
Mídia - Ekipa SIP
SIP/AIFAESA.