Díli, 03/12/2025 - AIFAESA no Trade Invest servisu hamutuk hodi realiza semináriu nasionál ho tema “Reforma Regulatória iha Timor-Leste no Haforsa Oportunidade Asesu ba Merkadu Rejionál (ASEAN) no Global (OMK)”. Atividade ne’e hala’o iha Salaun JL World Areia Branca, kuarta ne’e.
Iha diskursu boa vindas Inspetora Jeral AIFAESA Dra. Odete da Silva Viegas, Dermatologista hateten, tema ida ne’e la’os de’it tópiku semináriu nian, maibé apelu nasionál ida ba preparasaun, mudansa no progresu hodi hatán ba kompromisu estadu TL nian pos adezaun iha ASEAN no OMK. Inspetora mós agradese ba konvidadu de onra hotu ne’ebé partisipa, tanba bele tau hanoin hamutuk tanba konsideradu reforma regulatóriu, problema aihan seguru no protesaun konsumidor la’os de’it responsável AIFAESA nian maibé esforsu kolejial estadu, setór privadu no nasaun tomak nian.
Semináriu ba loron dahuluk ne’e, AIFAESA konvida oradór mai husi Adjunto Provedór PDHJ Dr. Rigoberto Monteiro aprezenta kona-ba Defeza Konsumidor nu’udar Protesaun ba direitu umanu. Koordenadór MCAE Dr. Jorge Martins ko’alia kona-ba estratejia no implementasaun sira TL nian ne’ebé tama ona iha OMK. Iha sesaun lorokraik Komisáriu CAC Dr. Rui Pereira explika kona-ba Tranparensia no Boa Governasaun. Dr. Pascasio Alves nu’udar Adjuntu Prokurador Jeral aprezenta matéria kona-ba Kolaborasaun PGR/MP ho AIFAESA ba kontrolu atividade ekonómika iha TL.
Entretantu, semináriu refere loke husi Vise Ministru Saúde Dr. Flávio Brandão no partisipa másimu husi Diretór Ezekutivu Trade Invest Eng. Arcanjo da Silva hanesan mós organizadór, PNTL, estudante universitáriu, emprezáriu/setór privadu, parseiru dezenvolvimentu inklui entidade relevante sira seluk.
Média - Ekipa SIP
SIP/AIFAESA.