RAEOA, 29/11/2025 - Autoridade Inspesaun no Fiskalizasaun ba Atividade Ekonómika, Sanitária, no Alimentár, I.P. (AIFAESA, I.P.), partisipa ativamente iha "Feira Produtu Lokál no Reforsu Ekonomia Rejionál" ne'ebé organiza husi Autoridade Rejiaun Administrativa Espesiál Oé-Cusse Ambeno (RAEOA) ho kolaborasaun ho Ministériu Komérsiu no Indústria.
Feira ne'e duradu semana ida hahú husi data 23 to'o 28 Novembru 2025, no partisipa ativamente hosi komunidade lokál sub-rejiaun 4 iha RAEOA. Objetivu fundamental hosi feira ne'e mak atu promove produtu lokál, reforsa atividade ekonómika no impulsiona kresimentu loká iha rejiaun refere.
AIFAESA, I.P. nu'udar instituisaun ne'ebé garante kualidade no seguransa konsumidór, agradese tebes ba Autoridade RAEOA hodi fo espasu banka espesiál ida ba AIFAESA hodi fasilita no disemina informasaun iha feira kona-ba ninia kna'ar no funsaun sira.
Dirijente Másimu AIFAESA, I.P. ho ekipa, partilla nia sentidu gratidaun ba komunidade lokál nia entuziasmu ho feira ne’ebé iha hodi vizita banka AIFAESA nian. Aleinde ida ne’e ekipa mós fahe informasaun liu husi distribui brosura, fo esplikasaun kona bá produtu, dispoin animasaun video badak kona-ba servisu no atividade AIFAESA nian ba vizitante sira, inklui operadór mikro-negósiu no públiku jerál.
Partisipasaun AIFAESA, I.P. iha feira ne'e atu reforsa kompromisu instituisaun nian ba apoiu kresimentu ekonomia rejionál ne'ebé iha kualidade no seguransa produtu ninian hodi hasa'e kresibilidade markadu nasionál Tantu internasionál.
Mídia - Arc.
SIP/AIFAESA.