Viqueque, 07/11/2025 - Ekipa Intregadu ne'ebé lidera hosi Inspetór Tékniku David Lemos, hamutuk ho ekipa relata rezultadu servisu durante hala'o iha Postu Administrativu tolu (3), hanesan Lacluta, Ossú inklui Viqueque Vila, nomós entrega relatóriu badak ba Prezidenti Autoridade Munisípiu Viqueque, Sr. Francisco C.S. de Gonzaga Soares, audénsia ne'e hala'o iha Salaun VIP, Administrasaun Munisípiu Viqueque.
Iha audénsia ne'e PAM Viqueque Sr. Francisco, agradese ba ekipa AIFAESA tanba bele marka prezensa iha Munisípiu Viqueque, hodi halo kontrulu ba operadór ekonómiku sira. Lideransa ne'e apresia ho AIFAESA nia servisu tanba lahanesan tinan hirak liuba, maibé ho prezensa Inspetóra Jerál Dra. Odete da Silva Viegas Dermatologista, nomós ekipa ne'ebé mak AIFAESA foun ne'e ami bele dehan katak Viqueque iha esperansa bo'ot ida bele servisu hamutuk, akompaña buat lubuk ida ligadu ho produtu sira ne'ebé ita bele konsumu.PAM hatutan tan ho prezensa faru kinur sira (Uniforme AIFAESA) hamrik iha ami kotuk ami nehan mós la'ós sin maibé nehan tata karau ruin mós bele tohar" hau fiar katak prezensa na'in hira nian ami espera katak tempu mai ne'e sei labrani atu halo sasan sira ladun di'ak.
Aliende ne'e PAM mós hato'o pontus importante no husu ba AIFAESA, atu ;
➡️ Atu halo kontrolu ba fatin produsaun be'e galon sira ne'ebé ezisti iha Munisípiu Viqueque
➡️ Husu Ekipa Inspetóres atu kontinua vizita no halo kontrolu nafatin ba operadór ekonómiku sira iha Munisípiu refere
➡️ Tékniku AIFAESA nian atu fó formasaun ba Tékniku Munisipál Viqueque
Iha audénsia ne'e partisipasaun másimu hosi Xefé Gabineti PAM, Assesór PDL, APA Viqueque, Xefé Suku, Diretór Munisipál inklui ekipa AIFAESA.
Mídia - GXG
SIP/AIFAESA.