Article Summary
Sub Inspetóra Jerál Quiteria da Costa SIP, MPA., hala'o enkontru iha Fronteira Batugade liga ho importasaun Ai-han
Batugade, 29/10/2025– Autoridade Inspesaun no Fiskalizasaun Atividade Ekonómika no Sanitária (AIFAESA), liuhusi Sra. Sub Inspetóra Jerál Quiteria da Costa SIP, MPA., akompaña hosi Diretóra Operasaun Sra. Claudinha Soares Pinto, Assesora Dra. Josefina Clarinha João hamutuk ho ekipa AIFAESA hala'o enkontru importante ida iha Postu Fronteira Batugade hodi hametin kooperasaun servisu nian ho entidade relevante sira iha fronteira.
Enkontru ne’e nu’udar esforsu atu asegura katak ai-han ne’ebé tama mai Timor-Leste (TL) liuhusi fronteira Batugade tenke tuir norma kualidade no seguransa ai-han ne’ebé determina ona.
Iha diskusaun ne’e, Sub Inspetora Jeral AIFAESA nian hateten katak kooperasaun forte entre instituisaun sira ne’e esensiál tebes atu garante protesaun ba konsumidór sira iha TL hodi kontrola no fiskaliza importasaun ai-han ho efikásia.
Enkuantu entidade hotu-hotu ne’ebé prezente prontu koopera hamutuk ho AIFAESA asegura katak ai-han ne’ebé hetan importasaun husi fronteira, liuliu iha Batugade, kualidade no seguransa garante ona hodi salvaguarda saúde públika ba sidadaun Timor-Leste nian.
Entidade ne’ebé marka prezensa no partisipa iha diálogu ne’e mak hanesan ALFANDEGA, QUARANTENA, PNTL, Xefe Suco Batugade, ho Autoridade lokál Batugade, inklui mós Jestór Fronteira.
Mídia - Dinna & Graca
SIP/AIFAESA.