Article Summary
Ermera, 23/10/2025 - Autoridade Inspesaun no Fiskalizasaun ba Atividade Ekonómika Sanitária no Alimentar, reprezenta husi Fiskál Úniku Sr. Salvador da Crúz hanesan orgaun datoluk husi AIFAESA hamutuk ho diretór departamentu metrolojia padronizasaun (DMP) Sr. João Morato, Assessora Dra. Josefina Clarinha no ekipa téknika sira, realiza enkontru koordenasaun servisu ho entidade relevante sira iha salaun STAE Gleno, Munisipiu Ermera, Kinta ne’e.
Iha atividade koordenasaun ne’e, loke diretamente husi Sekretáriu Autoridade Administrasaun Finansa Sr. José da Costa Gomes hodi hato’o agradesimentu “liu husi koodenasaun ne’e sai pasu importante atu bele proteje saúde públika liu husi kontrolu produtu iha merkadu, liu-liu Ermera ne’e rasik”.
Nune’e Fiskál Úniku ne’ebé reprezenta AIFAESA, enkoraja mós entidade hotu-hotu atu bele asume papél ho di’ak hodi kontribui ba hamenus risku ba saúde públika. Fiskál hatutan, AIFAESA sempre halo koordenasaun di’ak ho PNTL, atu asegura servisu inspesaun la’o ho di’ak, tanba ne’e agradese ba PNTL nomós ba parte hotu hotu ne’ebé sempre apoiu.
Hafoin ne’e, Diretór DMP AIFAESA halo aprezentasaun kona-ba kompeténsia AIFAESA ba aihan seguru no atividade ekonomia justu. Iha fatin hanesan Diretór Seguransa Aihan Ermera Sr. Danilo M. Babo ko’alia mós kona-ba papél no servisu seguransa ai-han nian. Enkuantu Diretór ba Jestaun Merkadu no Turizmu Ermera Sr.Júlio Soares explika kona-ba enkuadramentu legál, progresu servisu no dezafiu sira.
Aleinde ne’e, iha mós diskusaun interesante husi partisipante sira seluk hanesan, MCI, SECOOP, SERVE, Komandante Eskuadra Ermera, AME, MAPPF, SMSA, Saúde inklui STAE.
Mídia - FL
SIP/AIFAESA.